IFC Midnight yn sicrhau hawliau Gogledd America ar y ffilm arswyd ddialgar Gymraeg, Gwledd

Cyfarwyddwyd Gwledd gan Jones ac fe’i hysgrifennwyd a’i chynhyrchwyd gan Roger Williams. Yn serennu ynddi mae Annes Elwy, Nia Roberts, a Julian Lewis Jones ynghŷd â Sion Alun Davies, Steffan Cennydd, Rhodri Meilir, a Lisa Palfrey. Cynhyrchwyd Gwledd drwy gynllun Cinematic Ffilm Cymru Wales, ac fe’i hariannwyd gan S4C, Ffilm Cymru Wales, BFI (gan ddefnyddio arian y Loteri Genedlaethol) a Fields Park. Cynhyrchwyd y ffilm â chydweithrediad Melville Media Limited gyda chefnogaeth Great Point Media.

Mae Gwledd wedi ei gwreiddio yn chwedlau mytholegol grymus Cymru, ac yn y ffilm mae teulu cyfoethog yn ymgynnull un noson yn eu cartref moethus yng nghanol y mynyddoedd am bryd o fwyd. Mae gŵr busnes a ffermwr lleol wedi eu gwahodd yno er mwyn dod i drefniant busnes i dyllu’r tiroedd cyfagos. Pan ddaw merch ifanc ddieithr i weini arnynt, mae credoau a gwerthoedd y teulu’n cael eu herio wrth i’w phresenoldeb tawel, ond aflonydd, ddechrau chwalu eu bywydau - yn araf, yn gwbl fwriadol, a gyda’r canlyniadau mwyaf dychrynllyd. Mae Gwledd yn fyfyrdod dwys ar hanes a thraddodiad, trachwant a chyfrifoldeb, hunaniaeth a gwahaniaeth. Mae yma chwedl foes gyfoes sy'n cwestiynnu pwy ddylai etifeddu'r ddaear o ddifrif, gydag ymdeimlad cynyddol arswydus yn treiddio drwyddi, sy’n arwain at ddiweddglo gwaedlyd, dychrynllyd.

Saethpwyd Gwledd yn yr iaith Gymraeg, a fe’i dangoswyd am y tro cyntaf, dan law Midnight, yng Ngŵyl Ffilm SXSW 2021.  Bu i waith gweledol manwl Jones a pherfformiad iasol Annes Elwy yn y prif ran ddenu sylw beirniaid yr UDA a’r beirniaid rhyngwladol fel ei gilydd. Mewn adolygiad yn Screen International, bu i Nikki Baughan ganmol y perfformiad hwn fel un “hudolus”, gan ychwanegu, “Mae Annes Elwy yn syfrdanol o gynnil…mewn rhan sydd ag ychydig iawn o eiriau mae Elwy yn plymio i ddyfnderoedd annisgwyl Cadi gyda dwyster tawel”. Wrth adolygu ar gyfer Variety, dywedodd Jessica Kiang, “Mae rheolaeth oeraidd gwaith ffilmio Jones, a danlinellir gan y sain unigryw a sgôr atmosfferig, gyfareddol Samuel Sim, yn hoelio ein sylw’n llwyr a’n cadw’n gwingo ar y bachyn,” gan ychwanegu, “mae’r gwaith cyfarwyddo mor hyderus a’r crefftwaith mor berffaith mae Gwledd, er mai nifer fychan o gynhwysion sydd ynddi, yn ein llenwi cystal â phryd tri chwrs”

Meddai Arianna Bocco, Llywydd IFC Films, “Mae’n anodd ysgwyd y teimlad o ofn a phryder mae rhywun yn ei gael wrth wylio Gwledd, chwedl arswydus, wyrdroedig sydd yn eich cadw ar flaen eich sedd tan y diwedd dychrynllyd, sy’n gwbl deilwng o Guignol. ‘Rydym mor gyffrous o gael gweithio gyda Lee ar ei ffilm nodwedd gyntaf, ac yn edrych ymlaen yn arw at rannu Gwledd gyda chynulleidfaoedd ym mhob man sydd wrth eu bodd â ffilmiau arswyd.”

Ychwanegodd Roger Williams, yr awdur a’r cynhyrchydd, “‘Rwyf wrth fy modd y bydd IFC Midnight yn gweini Gwledd yn yr UDA a Canada. ‘Rwy’n siŵr y bydd cynulleidfaoedd ledled Gogledd America yn cael eu diddanu a’u harswydo gan ein ffilm Gymraeg unigryw, fydd, diolch i IFC Midnight, yn cyrraedd y gynulleidfa ehangaf bosib.”

Cafodd y ddêl am y ffilm ei negodi a’i chadarnhau gan Lywydd IFC Films, Arianna Bocco, a’r Cyfarwyddwr Caffaliadau, Aijah Keith, gyda Bankside Films yn cynrychioli’r gwneuthurwyr ffilm.