Gŵyl Animeiddio Caerdydd yn lansio Rhwydwaith Animeiddio Planet Positive i helpu'r sector i gyrraedd sero net

Mae Gŵyl Animeiddio Caerdydd (CAF) wedi lansio Rhwydwaith Animeiddio Planet Positive newydd i helpu cwmnïau animeiddio, VFX a gemau a llawryddion i ddod yn amgylcheddol gynaliadwy.

Wedi'i gynnal ar Discord, bydd y rhwydwaith gwyrdd yn fan i'r sector gael mynediad at a rhannu adnoddau ac ysbrydoliaeth sy'n berthnasol i'r diwydiannau animeiddio, gemau a VFX, a chydweithio i gyrraedd sero net.
Ar hyn o bryd mae gan y DU darged i gyrraedd allyriadau nwyon tŷ gwydr (GHG) sero net erbyn 2050. Ond mae gwyddonwyr ledled y byd wedi galw am dargedau mwy uchelgeisiol i atal cynhesu byd-eang. Mae CAF eisiau helpu'r diwydiannau animeiddio, VFX a gemau i gyrraedd sero net yn gynt.

Tra bydd y rhwydwaith newydd yn cael ei gynnal yn ddigidol, mae gan CAF gynlluniau i gynnal digwyddiadau i alluogi aelodau i gyfarfod a rhannu syniadau yn bersonol. Mae CAF hefyd yn rhannu adnoddau ar eu gwefan [cardiffanimation.com], ac yn cynnig gwasanaeth ymgynghori i gwmnïau animeiddio sydd eisiau ychydig mwy o help i gyrraedd sero net neu ddod yn
amgylcheddol gynaliadwy.

Meddai Lauren Orme, Cyfarwyddwr Gŵyl CAF: “Mae yna gyfoeth o gwybodaeth cynaliadwyedd ar gael, ond gall fod yn anodd dod o hyd i
adnoddau sy’n berthnasol i’r diwydiant animeiddio. Mae animeiddio’n dueddol o ddisgyn drwy’r craciau, ac yn aml nid oes gan y busnesau bach a chanolig a’r llawryddion sy’n ffurfio’r rhan fwyaf o ddiwydiant animeiddio’r DU amser i chwilio am bopeth i ddod o hyd i’r hyn sy’n berthnasol iddyn nhw. Rydym am helpu cwmnïau animeiddio a llawryddion, yn ogystal â'r rhai mewn VFX a gemau sy'n gweithredu mewn ffordd debyg i animeiddio, i gyrraedd sero net yn gynt na 2050. Fel allyrwyr carbon gweddol isel eisoes, mae gan y diwydiant animeiddio gyfle i arwain y ffordd mewn cynaliadwyedd.”

Canfu ymchwil CAF yn 2020 fod awr o animeiddio a gynhyrchwyd yng Nghymru yn 2019 wedi allyrru rhwng 1.4–4.3 tunnell o CO2e, dim ond 17–52% o’r hyn a ollyngwyd gan awr gyfartalog o gynhyrchu teledu. Roedd hyn hyd yn oed yn is yn y cyfnod clo, gan ostwng i rhwng 0.4-1.8 tunnell CO2e, dim ond 5-22% o effaith awr gyfartalog teledu.

Yn ogystal â cheisio helpu cwmnïau a llawryddion i leihau eu heffaith amgylcheddol, mae CAF yn ceisio helpu'r diwydiant i feddwl yn fwy cyfannol am gynaliadwyedd, gan gynnwys ffactorau cymdeithasol megis cymuned, tegwch, iechyd a lles, ac ystyried effaith gadarnhaol y gall gwaith animeiddio, VFX a’r diwydiant gemau ei gael ar agweddau at newid hinsawdd.

Mae CAF wedi bod yn gweithio ar brosiectau ymchwil a datblygu yn ymwneud â chynaliadwyedd ym maes animeiddio ers 2.5 mlynedd. Mae’r rhwydwaith yn rhan o brosiect Cymru Werdd a ariennir gan Clwstwr a Chronfa Her Cymru Werdd Ffilm Cymru Wales. Mae’r prosiect yn adeiladu ar ymchwil a datblygu blaenorol CAF a ariannwyd gan Clwstwr yn 2020.

Meddai Greg Mothersdale, Arweinydd Clwstwr ar Gynaliadwyedd Amgylcheddol: “Mae Gŵyl Animeiddio Caerdydd wedi parhau i gydweithio a chyflawni eu hamcan o sefydlu diwydiant animeiddio, VFX a gemau mwy cynaliadwy drwy Y&D (Ymchwil a Datblygu).

Mae ganddyn nhw allu cynhenid ​​​​i ddod â phobl at ei gilydd a chreu canlyniadau deniadol. Mae eu gwaith yn dangos sut y bydd eu gofod digidol cychwynnol yn denu’r diwydiant ato i gael gwybodaeth ac atebion posibl er mwyn lleihau ei effaith amgylcheddol. Rwy’n hyderus y byddant yn ysbrydoli eraill i anelu at sero net cyn gynted â phosibl. Edrychaf ymlaen at weld y datblygiadau pellach yn eu rhwydwaith, gofod a gwasanaeth llewyrchus.”

Meddai Chris Hill, Rheolwr Gwyrdd Ffilm Cymru Wales: "Mae'n amlwg bod yn rhaid i ni weithredu nawr i leihau ein heffaith negyddol ar yr amgylchedd.
Mae gennym ni i gyd rôl i'w chwarae wrth gyrraedd targedau lleihau cenedlaethol a byd-eang.

Mae Gŵyl Animeiddio Caerdydd, trwy Gronfa Her Cymru Werdd, wedi darparu gofod y mae mawr ei angen ar gyfer animeiddio, VFX a gemau i gael mynediad at wybodaeth a gwybodaeth gynaliadwy hanfodol wedi'i theilwra. Mae Rhwydwaith Animeiddio Planet Positive yn cynnig cyfle gwych i hybu arfer amgylcheddol yn ein sector sgrin ac rwy'n gyffrous i weld y gymuned hon yn ffynnu."